သိုၵ်းမၢၼ်ႈၶဝ်ႈလေႃႇတိုၵ်း သိုၵ်းတႆး ဢၼ်ပၵ်းတပ်ႉၾၢႆႇၸၢၼ်းမိူင်းသူႈ
သိုၵ်းမၢၼ်ႈတူင်ႉၼိုင်ၵၢၼ်သိုၵ်း ၵႂႃႇၽိုတ်ႉၶဝ်ႈလေႃႇတိုၵ်း တပ်ႉသိုၵ်းၸိုင်ႈတႆး (SSPP/SSA) ပွတ်းသၼ်လွႆၾႃႉၵၢပ်ႇ ၾၢႆႇၸၢၼ်းမိူင်းသူႈ ၸိုင်ႈတႆးပွတ်းၸၢၼ်း။ ၾၢႆႇသိုၵ်းမၢၼ်ႈၸီႉၼႄးဝႃႈ သိုၵ်းတႆးပူၼ်ႉပႅၼ်ပၵ်းတပ်ႉ ၵဵပ်းသိုၵ်းမႂ်ႇ ။
ဝၼ်းတီႈ 21/01/2017 မိူဝ်ႈၼႆႉပွတ်းၼႂ် ၶၢဝ်းယၢမ်း 9 မူင်းၶိုင်ႈပၢႆ၊ တပ်ႉသိုၵ်းလူင်ပွင်ၸိုင်ႈ တပ်ႉမတေႃႇမၢၼ်ႈ တင်း ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး (SSPP/SSA) ပဵၼ်ပၢင်တိုၵ်းၵၼ်တီႈ ပွတ်းသၼ်လွႆၾႃႉၵၢပ်ႇ ႁိမ်းဝၢၼ်ႈပၢင်ငႃႉ ၾၢႆႇၸၢၼ်းဝဵင်းမိူင်းသူႈမွၵ်ႈ 3 လၵ်း၊ ယွၼ်ႉသိုၵ်းမၢၼ်ႈ တူင်ႉၼိုင်ႁွၼ်ႈထဝ်ႇၾၢႆႇၸၢၼ်း မိူင်းသူႈသေ ၽိုတ်ႉလေႃႇတိုၵ်း တပ်ႉသိုၵ်းၸိုင်ႈတႆး SSPP/SSA ဢၼ်ပၵ်းပႂ်ႉတူင်ႉၼိုင်ယူႇပွတ်းတွၼ်ႈၼၼ်ႉ- ၼႆယဝ်ႉ ။
ၵဵဝ်ႇၵပ်းလွင်ႈပၢင်တိုၵ်းၼႆႉ ၸဝ်ႈၽူင်းႁၢၼ် ၽူႈၶၢၼ်ပၢၵ်ႇ SSPP/SSA လၢတ်ႈဝႃႈ- ယၢမ်းလဵဝ်ပဵၼ်ၶၢဝ်း ၶိုင်သၢင်ႈ တႃႇၶဝ်ႈႁူမ်ႈပၢင်ၵုမ်လူင်ႁူဝ်ပၢၵ်ႇပီ 21 ပၢင်လူင် ပွၵ်ႈၵမ်းသွင်။ ၼင်ႇႁိုဝ်ပၢင်တိုၵ်းတေဢမ်ႇယႂ်ႇၵႂၢင်ႈ ၵႂႃႇၼၼ်ႉ ၽူႈယႂ်ႇၵူၼ်းလူင် တိုၵ်ႉၶတ်းၸႂ်ဢုပ်ႇဢူဝ်းႁႃတၢင်းၵႄႈလိတ်ႈယူႇ- ဝႃႈၼႆ ။
ၾၢႆႇသိုၵ်းမၢၼ်ႈၸီႉၼႄးဝႃႈ ၾၢႆႇသိုၵ်းတႆးပူၼ်ႉပႅၼ်ပၵ်းတပ်ႉ ၵဵပ်းသိုၵ်းမႂ်ႇ။ ႁႂ်ႈသိုၵ်းတႆးပွႆႇပၼ်သိုၵ်းမႂ်ႇ ၸိူဝ်းၼၼ်ႉၶိုၼ်းတင်းမူတ်းသေ ႁႂ်ႈထွၼ်တပ်ႉဢွၵ်ႇထုင်ႉၼၼ်ႉ။ ၵူၺ်းၵႃႈ ၾၢႆႇတပ်ႉသိုၵ်းၸိုင်ႈတႆးလၢတ်ႈဝႃႈ ၼႆႉပဵၼ်ၶေႃႈၵၢဝ်ႇႁႃၸီႉၼႄးၾၢႆႇသိုၵ်းမၢၼ်ႈၵူၺ်း၊ တပ်ႉသိုၵ်းၸိုင်ႈတႆးၼႆႉ လုၵ်ႉတီႈပေႃႈမႄႈၵူၼ်းမိူင်းသေ ပဵၼ်မႃးမီးမႃးၵူၺ်း- ဝႃႈၼႆ ။
ပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆး (SSPP/SSA) ၼႆႉ ပႆႇတူဝ်ႈတၼ်း တႃႇလူင်းလၢႆးမိုဝ်းလိၵ်ႈၵိၼ်ၵႅၼ်ႇ ၵၢၼ်ၵိုတ်းယိုဝ်းတူဝ်ႈမိူင်း (NCA) သေတႃႉ လူင်းလၢႆးမိုဝ်းၵေႃႇသၢင်ႈလွင်ႈငမ်းယဵၼ် ၸၼ်ႉၸႄႈမိူင်းလႄႈ ၸၼ်ႉမိူင်းႁူမ်ႈတုမ် ဝႆႉတင်းလူင်ပွင်ၸိုင်ႈတဵင်းၸဵင်ႇ ။
http://shan.panglong.org/2017/01/21/%E1%80%9E%E1%80%AD%E1%80%AF%E1%81%B5%E1%80%BA%E1%80%B8%E1%80%99%E1%81%A2%E1%81%BC%E1%80%BA%E1%82%88%E1%81%B6%E1%80%9D%E1%80%BA%E1%82%88%E1%80%9C%E1%80%B1%E1%82%83%E1%82%87%E1%80%90%E1%80%AD%E1%80%AF/
Comments
Post a Comment